கிராமத்தில் எனது பால்ய பருவத்தில் பார்த்த, பழகிய, அறிந்த மனிதர்களை கதாப்பாத்திரங்களாக நாவல் முழுவதும் உலவ விட்டிருக்கிறார். கதாபாத்திரங்கள்
கற்பனையாக சித்தரிக்கப்பட்டவர்கள் என்று நாம் அறிந்திருந்தாலும் அவர்களின் கள்ளம் கபடமற்ற, அன்பு நிறைந்த உரையாடல் மூலம் நாமும் அவர்களை 'பார்த்து, பேசிப் பழக வேண்டும் என்கிற நினைப்பை' நம்மிடம் ஏற்படுத்தும் அளவிற்கு, அவருடைய எழுத்து வெற்றிப் பெற்றிருக்கிறது.
பால்யத்தில் நானறிந்திருந்த, தற்போது மறந்துவிட்ட வட்டார வழக்கு சொற்களை மீண்டும் நினைவுபடுத்தியதின் மூலம் ஒரக்குழி நாவல், எனது பள்ளிப்பருவத்து நாள்களின் நினைவுகளைக் கிளறிவிட்டுள்ளது. மேலும், இன்றைய மக்களின் வாழ்வியல் நடைமுறைகளையும் சொல்லியுள்ளார்.
பல வருடங்களாக, தனது கடின உழைப்பால் பெற்ற அனுபவத்தை நாவல் வழியாக நம்மிடையே பகிர்ந்துள்ளார், ஆசிரியர்.
தான் வாழ விரும்பும் சூழலை ஒரக்குழி நாவல் வழியாக கட்டமைத்துள்ளார், திரு வானவன் அவர்கள். நேர்மறையான எண்ணங்களை மக்கள் மனதில் விதைக்க வேண்டும் என்கிற எண்ணம் எப்போதும் அவரிடம் இருக்கும். அதனையும் நாவலில் காண முடிகிறது.
விஷமில்லாத காய்கறி உற்பத்தி மற்றும் அதன் மூலம் வரும் பொருளாதார வளர்ச்சியையும் எடுத்துச் சொல்லியுள்ளார்.
இன்றைய சூழலில் கிராமங்களில் இயற்கை விவசாயம் குறித்த புரிதல் ஒரு சிலரிடம் உள்ளது. அதுவும், "வீட்டுக்கு மட்டும் மருந்தடிக்காம ஒரு வயல விட்டிருக்கோம்!" என்கிற அளவில்தான்.
கிராமங்களில் விவசாய நிலம் வைத்துள்ளவர்கள் விவசாயத்தின் மீது நம்பிக்கை வைக்காமல், அதனை மனைகளாக மாற்றி விற்பதனாலோ அல்லது பேரிடர் காலங்களில் கிடைக்கும் காப்பீட்டுத் தொகையினால் மட்டுமே வருமானம் வரும் என்று நினைக்கும் மனநிலைக்கு மாறிவிட்டார்கள்.
நேரெதிராக, நகரங்களிலோ செலவுகளைப் பற்றி கவலைப்படாமல் 'பக்கெட்டில்' மண் வைத்து விஷமில்லாத காய்கறி உற்பத்தி செய்து சாப்பிடத் தொடங்கி விட்டார்கள். இந்தப் பெரிய இடைவெளியை சரிசெய்வதற்கு வழிக்காட்டுகிறது ஒரக்குழி நாவல்.
எனது பணிஓய்வுக்கு பிந்தைய வாழ்க்கையில் நான் பயணிக்க விரும்பும் பாதைகளின் தேர்வில், இயற்கை விவசாயமும் ஒரு பாதையாக இருக்கவேண்டும் என 'ஒரக்குழி' எனக்கு சுட்டிக்காட்டுகிறது.
சுப நிகழ்வுகளில் பரிசளிக்க உகந்த நூல்களின் வரிசையில் முதலில் நிற்கிறது ஒரக்குழி!
இரண்டு நாட்களுக்கு முன்பு, 'டைம்ஸ் ஆப் இந்தியா'வில் வந்த செய்தி ஒன்று மரபு சார்ந்த அரிசி மற்றும் கோதுமையின் முக்கியத்துவத்தை அறிவியல் பூர்வமாக நமக்கு புரிய வைத்துள்ளது.
இனிவரும் காலம் இயற்கை விவசாயத்தின் காலம் என்பதை உறுதிப்படுத்துகிறது, மேற்கண்ட செய்தி.
வாழ்த்துகள் வானவன் சார்💐🙏
அனைவருக்கும் புத்தாண்டு
வாழ்த்துகள்💐💐💐
நன்றி🙏
பி.கு. கருப்பம்புலம் முன்னோடி புத்தக நிலையத்தில் ஒரக்குழி நாவல் கிடைக்கிறது.
