1988-இல் D. Pharm. படித்து முடித்திருந்த காலத்தில் மருந்துக் கடை தொடங்குவது சம்பந்தமாக செம்போடை டாக்டர் சொக்கலிங்கம் அவர்களை சந்திக்க, நண்பர்களோடு சென்றிருந்தேன்.
அப்போது, அவருடன் மெலிந்த தோற்றத்தில் ஒரு இளைஞர் நின்று கொண்டிருந்தார். அவரை எங்களுக்கு அறிமுகம் செய்து வைத்தார் டாக்டர் சொக்கலிங்கம் அவர்கள்.
அவர் சிதம்பரத்தில் ‘எம்பில் மியூசிக்' படிப்பதாக எங்களிடம் தெரிவித்தார்.
நானோ, என்னுடன் வந்திருந்த நண்பர்களோ அவருடன் உரையாடலைத் தொடராமல், டாக்டரிடம் மட்டும் பேசிக் கொண்டிருந்துவிட்டு வந்துவிட்டோம்.
சரியாக இரண்டு வருடங்கள் கழித்து கருப்பம்புலம் ராமர் கோவில் திருவிழாவில் நாட்டுப்புற இசைக் கச்சேரி நடப்பதாக அறிந்து பார்க்கச் சென்றிருந்தேன். மிகப்பெரிய கூட்டம். எங்கோ தூரத்திலிருந்து அந்தக் கச்சேரியைக் கேட்டு ரசித்தேன்.
கச்சேரியில் பாடியவர் செம்போடையில் டாக்டர் சொக்கலிங்கம் அவர்களால் அறிமுகப்படுத்தப்பட்ட இளைஞர் தான் என்று அன்று என்னுடன் வந்திருந்த நண்பர்கள் எனக்கு நினைவூட்டினார்கள். ஆம், அவர்தான் டாக்டர் புஷ்பவனம் குப்புசாமி அவர்கள்.
அதன் பிறகு சென்னையில் என்னுடைய ஊரை விசாரிக்கும் நண்பர்கள், வேதாரண்யம் என்றவுடன் "புஷ்பவனம் குப்புசாமி அவர்களின் ஊரா?" என்று கேட்பார்கள். வேதாரண்யத்திற்கு அவர் ஓர் அடையாளமாக மாறிப் போனார்.
இன்று அவருக்கு தமிழ்நாடு அரசின் இயல் இசை நாடக மன்றத் தலைவர் பதவியை தமிழக அரசு வழங்கியுள்ள தகவல் அறிந்து மகிழ்ச்சியடைகிறேன்.
அவர் இந்தப் பதவியில் சிறப்பாகச் செயல்பட்டு, நமது பாரம்பரியக் கலைகள் மற்றும் கலைஞர்களின் முன்னேற்றத்திற்கு பாடுபடுவார் என்பதில் சந்தேகமில்லை.
அவருடைய பணி சிறப்பாக அமைய வாழ்த்துவோம் 💐💐💐 வாருங்கள்!
Pushpavanam Kuppusamy